Məktəbli formaları niyə alınmır? - 2 manat 80 qəpiyə də satırlar, ərzaq bazarında da...

Artıq dərs ilinin başlamasına sayılı günlər qalıb.

Adətən yeni tədris ilinə yaxın sıxlığın ən çox hiss olunduğu yer məktəbli formalarının satışı ilə məşğul olan mağazalar olur. Bu il isə nə qələbəlik, nə də uzun-uzadı növbələrə rast gəlinir. Ötən illərlə müqayisədə bu il alıcı izdihamı müşahidə edilmir.

Satıcılar bildiriblər ki, məktəbli forması alanların sayı çox azdır. Maraqlıdır, bəs bu il alıcı qıtlığının səbəbi nədir?

Bakı Tikiş Evinin satış müdiri Etibar Əzimov bildirib ki, vətəndaşlar Çindən gətirilən formalara üstünlük verdiklərinə görə Tikiş Evində alıcılıq qabiliyyəti aşağıdır:

“Keçən il valideynlərin əlindən buradan keçmək olmurdu. Hazırda isə çox az alıcı var. Parçaları Türkiyədən, Belarusdan gətiririk. Nazirlər Kabinetinin qərarında olduğu kimi, bütün köynəklərin materialı 100 % pambıqdır. Mənşəyi bilinməyən məktəb formalarını Çindən gətirirlər, bütün yarmarkalarda, hətta meyvə-tərəvəz satışı mağazalarında satırlar”.

Qeyd edək ki, hazırda məktəbli köynəyinin qiyməti 12, şalvar və ətəklər isə 20 manata təklif olunur.