Messiyə doğum gününə “Azərxalça” imzalı “Əjdaha” hədiyyə edildi
Azərbaycanlı iş adamı Adnan Əhmədzadə Lionel Messinin ad günündə iştirak edərək ona Azərbaycan xalçasını hədiyyə edib və bu xalça məhz “Azərxalça” ASC istehsalı olan xalçadır.
Azərbaycan xalçaçılıq məktəbinin ən geniş yayılan nümunələrindən olan “Əjdahalı” xalçaları qədim və zəngin tarixə malikdir. Şərq aləmində “əjdaha” evin, ocağın şər qüvvələrdən qorunmasını simvolizə edən motiv nümunələridir.
Xalçanın kompozisiyasının şərhinə gəldikdə isə “əjdaha” təsvirli xalçaların əsas sahəsi qırmızı, bəzən mavi və ya qəhvəyi rənglərin ahəngdar bölgüsündən ibarətdir. Kəsişmə xətləri və kənarları böyük palmetlərlə örtülmüş dişli yarpaqlarla əhatələnir. Xalçaların üzərlərində stilizə olunmuş əjdaha təsvirləri naxışlar vasitəsilə verilir.
“Əjdaha” simvolu olan naxış və elementlər bütün şərqdə çox qədimdən mövcud olsa da, ilk “Əjdahalı” xalçalar Səfəvilər dövründə yaranıb. “Azərxalça” ASC-də “Əjdahalı” kompozisiyasında icra olunmuş ipək xalçanın dünya şöhrətli, argentinalı futbolçu L.Messinin evini bəzəməsi bənzərsizliyi ilə qəlblərə yol tapan Azərbaycan xalçalarının sərhəd tanımayan cazibəyə malik olmasını bir daha göstərir.
![icon](/images/loading.png)