Metrodakı problemlə bağlı rəsmi açıqlama | Qatar depoya göndərildi

“Bakı Metropoliteni”nin “Əhmədli”-“Dərnəgül” marşrutu üzrə hərəkət edən qatar “28 May” stansiyasında olan zaman texniki nasazlıq ehtimalı yaranıb. Bu səbəbdən maşinistin qərarı və dispetçerə verdiyi məlumat əsasında sərnişinlərin düşürülməsi, qatarın yoxlanılması zərurəti yaranıb”.

Bunu “Bakı Metropoliteni”nin sözçüsü Bəxtiyar Məmmədov deyib.

O bildirib ki, qatar sənişinsiz olaraq yoxlanan zaman texniki nasazlığın olduğu təsdiqini tapıb və elektrik deposuna göndərilib:

“Bunun əvəzinə xəttə ehtiyat qatar buraxılıb. Hadisə gur saatda – 18:20-də, həm də “28 May” kimi sərnişinlərin sıxlığı ilə müşahidə olunan stansiyada baş verdiyinə görə onların qatardan düşürülməsi kifayət qədər zaman alıb”.

B.Məmmədov əlavə edib ki, bir saat ərzində qatarların hərəkətinin intervallara uyğun tənzimlənməsi prosesi həyata keçirilib:

“28 May” və “Elmlər Akademiyası” kimi sərnişin axınının xüsusi sıxlığı ilə seçilən stansiyalarda girişdən başlamaqla buraxılış-nəzarət mexanizmləri xüsusi olaraq gücləndirilib.

Bir sıra hallarda sərnişinlərin girişinə qısamüddətli məhdudiyyətlər tətbiq olunub. Bunun da əsas səbəbi “Bakı Metropoliteni”nin adıçəkilən stansiyalarında platforma səviyyəsinin ifrat dərəcədə yüklənmədən qorunması olub”.

Əlavə olunub ki, tənzimləmədən sonra “Bakı Metropoliteni”nin xətlərində hərəkət normallaşıb və hazırda da bütün proseslər texniki normativlərin tələbinə uyğun olaraq icra edilir.