MİDA-nın yeni layihəsi | Güzəştli mənzil sistemi ilə bağlı detallar

Mənzil İnşaatı Dövlət Agentliyinin növbəti layihəsi olan Sumqayıt Yaşayış Kompleksində 392, Lənkəran Yaşayış Kompleksində isə 152 mənzil satılıb.

MİDA-nın şöbə müdiri Cəmşid Əmirov jurnalistlərə açıqlamasında bildirib ki, mənzillər qısa müddət ərzində vətəndaşlar tərəfindən seçilib:

“Əksəriyyətinin mənzil sifarişi sənədi təqdim olunub. Agentliyin fəaliyyəti dövründə bu günə qədər 16 satış həyata keçirilib. “Güzəştli mənzil” sistemində bu günə qədər uğurla qeydiyyatdan keçib elektron kabinet əldə edənlərin sayı 38 mindən çoxdur”.

Cəmşid Əmirov onu da bildirib ki, mənzil seçiminin qanunsuz sürətləndirilməsi prosesinin qarşısı alınması məqsədilə əlavə təhlükəsizlik tədbirləri həyata keçirilib. Sistemdə heç bir problem müşahidə olunmayıb. Gözləmə qaydasında mənzil seçimi isə dekabrın 10-u saat 11:00-dan 14 dekabra qədər davam edəcək.

Qeyd edək ki, gözləmə qaydası vətəndaş tərəfindən seçilən mənzilin hər hansı səbəbdən alınmadığı halda növbədə olan növbəti vətəndaşa təqdim edilməsi prosesidir. Bununla yanaşı, MİDA-nın yeni 3 layihəsi – Binəqədi, Şirvan və Yevlax yaşayış komplekslərinin icrası da davam edir. Bu layihələrdə 3 000 mənzilin inşası nəzərdə tutulub.