Müasirlik adı ilə bakirəlik, namus dəyərlərini yox edirlər | Azərbaycanda din və müasirlik - AMİN

“Amin” verilişinin yeni buraxılışı yayımlanıb.

Verilişin budəfəki sayında din və müasirlik mövzusu ətrafında müzakirə aparılıb.

Millət vəkili Fazil Mustafa Avropada və Azərbaycanda din, müasirlik anlayışlarını müqayisə edərkən bildirib ki, Qərbdə sözügedən mövzu ətrafında müzakirələr aparılmır:

“Orada din müasirliklə hər hansı mənada ziddiyyət təşkil etmir. Çünki inanc cəmiyyətdə insanın özəl məsələsi hesab olunur. Şərqdə isə bu mübahisə həmişə olub. Çünki dində daha çox geriyə doğru baxış var. Bu zaman isə din müasirliklə ziddiyyət təşkil etməyə başlayır. Təhlükəli məqam isə insanı modern dəyərlərdən uzaqlaşdırmağa çalışmasındadır”.

Fazil Mustafa vurğulayıb ki, dəyərlərə baxış əsasən üç istiqamətdə olmalıdır:

“Ölən, dəyişən və yaşayan dəyərlər var. Elə keyfiyyətlər var ki, tarixin müəyyən hissəsində yox olur. Şərqdə model mərkəzli, Avropada isə insan mərkəzli düşüncə var. Avropada insana xidmət etməyən, ona faydalı olmayan elm, fəlsəfə, din arxa plana qoyulur. Çünki bunlar cəmiyyətin tərəqqisinə mane olan keyfiyyətlər hesab olunur”.

Millət vəkili onu da əlavə edib ki, hazırda bayağılığın səviyyəsi 95 faizdir və bunu aşağı endirməyə çalışmalıyıq:

“Cəmiyyətin dəyişməsini aristokratik azlıq istəyir. Onların səviyyəsi aşağı düşəndə və yaxud təsir mexanizmi azalanda insanlar çürüməyə başlayır. Hazırda texnologiyanın bizə verdiyi imkanlardan düzgün istifadə edə bilmirik. Burada qeyd olunan azlığın gücünü göstərsək, digəriləri bayağılığa çox meyil etməyəcəklər.

Quranı oxuyaraq insan mükəmməl, kamil yetişə bilər, eyni zamanda qatil də ola bilər. Görürük ki, bəzi terror qruplaşmalarının timsalında vəhşilər yetişir. Bunlarla yanaşı, mükəmməl olan azlıqlar da var. Dində zorakılıq yoxdur və bu onun əsas prinsipidir. Ona görə də sözügedən məqamları doğru anlamaq lazımdır”.