Novoivanovka kəndinin sirləri | Bu kəndi kimlər niyə tərk edib? - KƏNDİNƏ QAYIT

“Kəndinə qayıt” verilişinin yeni buraxılışında Azərbaycanın ən qədim bölgələrindən biri olan Gədəbəyin əvvəllər “Qarapapaq”, “Seyiddərəsi” adlandırılan Novoivanovka kəndinə səyahət edilib.

Novoivanovka Gədəbəyin sonuncu sərhəd kəndidir. Rayon mərkəzindən buraya olan məsafə təxminən 35 kilometrdir. Kənddə 2000-ə yaxın əhali yaşayır.

Yaşayış məntəqəsi 1852-ci ildə qonşu Novosaratovka kəndindən ayrılaraq burada məskunlaşan İvanov adlı şəxsin adı ilə bağlıdır. Kəndin adı “İvanovun yeni kəndi” mənasını verir.

Əvvəllər burada ruslar çoxluq təşkil etsələr də, bu gün onların sayı azalıb. Hazırda kənddə Qərbi Azərbaycandan olan soydaşlarımız üstünlük təşkil edir.

Müharibə dövründə bir çox ruslar kəndi tərk etsə də, Nadia nənə “mənim Vətənim buradır” deyərək heç yerə getməyib.

“Mən Rusiyaya bir dəfə getmişəm, amma bizim xalqı onlara dəyişmərəm. Yoldaşım dedi ki, ora yaxşıdır, köçək. Mənim atam, babam ‒ hamısı burada yaşayıb. Mən necə torpağımı qoyub gedə bilərəm?! Bizim millət hamısından yaxşıdır. Yoldaşım da rus idi. Əvvəllər meşəyə, kluba gedirdik, qışda xizək sürürdük, klubda rəqs edirdik. Mən onunla kinoda tanış oldum”, ‒ o bildirib.