Novxanı sahillərində qeyri-adi mənzərə | Ərazini çəyirtkələr basıb - Baku TV

Novxanı çimərliyində dincələn vətəndaşlar xoşagəlməz halla qarşılaşıblar. Onlar sahilboyu çəyirtkələrin sayının artmasından şikayətçidirlər.

Sakinlərin sözlərinə görə, əvvəlki illərdə sahildə bu qədər həşərat müşahidə olunmayıb.

Bəs çəyirtkələrin belə kütləvi şəkildə çoxalmasına səbəb nədir?

“Dəhşətli dərəcədə çox çəyirtkə var. Dənizin qırağı onlarla doludur. Əvvəlki illərdə bu qədərini görməmişdim, ilk dəfədir belə halla rastlaşıram”, – deyə vətəndaşlardan biri bildirib.

Məsələ ilə bağlı biologiya üzrə fəlsəfə doktoru Barat Əhmədov qeyd edir ki, çəyirtkələr əsasən bitki örtüyü zəngin olan ərazilərdə məskunlaşır və qidalanırlar. Görünür, onların yumurta qoyduqları sahələr ya əkin yerlərinə çevrilib, ya da oradakı bitki örtüyü məhv edilib. Nəticədə, həşəratlar qida axtarışında müxtəlif istiqamətlərə üz tuturlar:

“Çimərliklərdə çəyirtkələrin görünməsi normal hal deyil, qeyri-adidir. Çünki onlar yalnız qidalanma mühiti dağıdılanda və ya yaşayış arealları tamamilə məhv ediləndə bu cür ərazilərə miqrasiya edirlər”.