Orucluqdan sonra necə qidalanmalıyıq? | Elə yemək lazımdır ki... - Baku TV

Müqəddəs Ramazan ayı artıq geridə qalıb. Səbr, ibadət və paylaşma ilə keçən bu ayın ardından bayram bayrama qarışıb.

Bir ay oruc tutandan sonra Novruz azuqələrindən yeyib bədənimizi şoka sala bilərik. Çünki bədən bu qidalara alışıq deyil. Uzunmüddətli aclıqdan sonra qidalanma qaydalarına diqqət edilməzsə, sağlamlıqla bağlı ciddi problemlər ortaya çıxa bilər.

Diyetoloq Leyla Zülfüqarlı bildirir ki, gündəlik qidalanmada hər gün üçün bir əsas yemək seçilməsi daha məqsədəuyğundur:

“Vacib deyil ki, eyni süfrədə həm dolma, həm plov, həm də müxtəlif salatlar yer alsın. Salatların da yağlı və çiy növləri var. Tövsiyə edirəm ki, axşam yeməyində əsas isti yeməklərdən biri seçilsin. Məsələn, plov seçilərsə, onun yanında mütləq çiy tərəvəz salatı olmalıdır. Xama ilə hazırlanmış yağlı salatlar günün birinci yarısında və ya əsas yemək kimi ayrıca qəbul edilməlidir.

Digər vacib məqam isə şirniyyatlarla bağlıdır. Şirniyyatlar əsas yemək süfrəsinə daxil edilməməlidir. Çünki şirniyyat süfrəsi öz-özlüyündə bir yemək fasiləsidir. Paxlava və şəkərburanın kalorisi bir boşqab yeməyə bərabərdir”.