Paytaxt və bölgələrdə sabaha gözlənilən hava şəraiti açıqlandı | Hava haqqında məlumat - Baku TV

İyulun 27-si və 28-də Bakıda, Abşeron yarımadasında və Azərbaycanın bəzi bölgələrində güclü külək əsəcək.

Bu barədə Milli Hidrometeorologiya Xidməti məlumat yayıb.

Bildirilib ki, Bakıda və Abşeron yarımadasında hava şəraitinin əsasən yağmursuz keçəcəyi gözlənilir. İyulun 27-də güclənən şimal-qərb küləyi 28-i günün ikinci yarısından etibarən tədricən zəifləyəcək. Havanın maksimal temperaturu 29-31° isti olacaq.

Azərbaycanın rayonlarında da hava şəraitinin əsasən yağmursuz keçəcəyi proqnozlaşdırılır. Gecə və səhər saatlarında bəzi dağlıq ərazilərdə arabir duman olacaq. Mülayim qərb küləyi bəzi yerlərdə arabir güclənəcək. Havanın maksimal temperaturu Aran rayonlarında 35-39°, bəzi yerlərdə 40° isti, dağlıq ərazilərdə isə 25-30° isti olacaq.

İyulun 27-si və 28-də Bakıda, Abşeron yarımadasında və bəzi bölgələrdə gözlənilən küləkli hava şəraiti ilə əlaqədar sarı və narıncı xəbərdarlıq verilib. Küləyin sürətinin saniyədə 13,9 metrdən 28,4 metrədək güclənəcəyi gözlənilir.

Küləkli hava şəraiti ilə əlaqədar dənizdə dalğaların hündürlüyünün artacağı bildirilir. Əhaliyə çimərliklərdə ehtiyatlı olmaq tövsiyə edilir.