“Qəza etməsəniz də, daha çox ödəyəcəksiniz” | Sığorta ödənişləri daha da yüksələcək? - Baku TV

Bir müddət əvvəl ancaq taksidə istifadə olunan avtomobillərin icbari sığortası haqlarına xüsusi əmsal tətbiq edən Mərkəzi Bank bu dəfə daha geniş miqyasda dəyişiklik edib.

Dəyişikliklərdən biri mövcud "Bonus-Malus" sisteminin fərdi sığorta tarixçəsinə əsaslanan Sığorta Tarixçəsi Əmsalı ilə əvəz olunmasıdır. Yeni qaydalara əsasən, sürücü il ərzində qəza törətmədiyi halda sığorta haqqına 5 faiz güzəşt tətbiq ediləcək. Əksinə, üçüncü şəxslərin sağlamlığına və əmlakına zərər vurulduqda isə hər hadisəyə görə sığorta haqqına 30 faiz əlavə hesablanacaq.

Əvvəlki mexanizmdə əlavə faiz sürücünün qəzasız keçirdiyi illərin sayına görə hər qəza üzrə 20 faizdən başlayırdı. Bu isə yeni sistemdə bəzi hallarda sığorta haqqının daha çox artmasına səbəb ola bilər.

Digər yeniliyə əsasən, sığorta müqaviləsi bağlanarkən avtomobili idarə etmək hüququ olan şəxslərin sayı birdən çox olarsa, həmin şəxslər arasında ən yüksək riskə malik sürücünün sığorta tarixçəsi əmsalı əsas götürüləcək.

Sığorta üzrə ekspert Şahin İsmayılov qeyd edib ki, əvvəlki sistemdə bəzi sürücülər qəza törətdikdən sonra etibarnaməni başqa şəxsin adına rəsmiləşdirərək cərimə xarakterli əlavə ödənişdən yayınırdılar. Yeni qaydalar bu halların qarşısını almağa hesablanıb.

Bu isə o deməkdir ki, artıq avtomobilə etibarnamə verərkən və ya belə hüquq alarkən həmin şəxsin sığorta tarixçəsi nəzərə alınmalıdır. Əks halda, sürücü özü qəza törətməsə belə, daha yüksək sığorta haqqı ödəməli ola bilər.

Qəzalara görə sığorta ödənişlərinin maksimum məbləği isə dəyişməz qalacaq. Hələ 2011-ci ildə müəyyən edilən limitlər qüvvədə saxlanılır.

Qeyd edək ki, sözügedən dəyişikliklər iyunun 21-dən qüvvəyə minəcək.