Qızılcaya görə məktəblər bağlanacaq?

Son günlərdə qızılcaya yoluxma səbəbindən 3 uşaq həyatını itirib.

Onlardan 1-nin təhsil aldığı və 200-dən çox qızılcaya yoluxmanın qeydə alındığı 195 nömrəli tam orta məktəbin ibtidai siniflərində artıq distant tədrisə başlanılıb.

Bəs digər təhsil müəssisələrində necə? Onlayn tədrisin başlanması nə dərəcədə realdır?

Məsələ ilə bağlı təhsil eksperti Kamran Əsədov bildirib ki, yoluxma hallarının müşahidə edildiyi məktəblərdə ən azı 14 gün dərslər onlayn rejimdə olmalıdır:

“Dərs prosesinin ənənəvi formada təşkilinə icazə vermək olmaz, çünki bu, təhlükəlidir. Yoluxma sayına təsir göstərə bilər. Tibbi xidmət də çox aşağıdır. Mütləq distant tədrisə başlanılmalıdır”.

Təhsil eksperti Elçin Əfəndi isə həmkarı ilə razılaşmır. Bildirir ki, distant təhsil yoluxmanın qarşısını almağa kömək etsə də, şagirdlər tədris proqramında xeyli geri qalacaqlar.

Valideynlərin isə məsələyə münasibəti müxtəlifdir. Bəziləri distant təhsilə keçidin tərəfdarıdır, bəzi valideynlər isə düşünürlər ki, dərslər onlayn formada keçirilsə, uşaqlar zəifləyəcəklər.

Elm və təhsil naziri Emin Əmrullayev də noyabrın 30-da keçirdiyi mətbuat konfrasında məsələyə münasibət bildirib. Nazir tədrisin distant formaya keçirilməsinə hələlik ehtiyac görmür.

Pandemiya dövrünü nəzərə alsaq, əslində, vəziyyəti qiymətləndirmək o qədər də çətin deyil. Ekspertlər bildirirlər ki, ölkədə distant təhsilə keçid olarsa, istər summativ qiymətləndirmələrdə, istəsə buraxılış və qəbul imtahanlarında nəticə aşağı düşəcək.