"BakuBus"da xanım sürücülər işə başladı | "Kişilər bacarırsa, qadınlar da bacarar"

Noyabrın 24-dən 3 aylıq təlim prosesindən sonra vətəndaşları xanımların da idarə edəcəyi marşrutla səyahət gözləyir.

Qeyd edək ki, iştirakçılar xüsusi hazırlanmış marşrutlar üzrə sərbəst idarəetmə sınaqlarından keçiblər.

Xanım sürücülərdən biri olan Rəna Cəfərova Baku TV-yə müsahibəsində yeni işi ilə bağlı təəssüratlarını bölüşüb:

“İnformatika müəllimliyi ixtisasını bitirmişəm. Həmçinin 20 ildən çox sürücülük təcrübəm var. Bu, arzuladığım peşə idi. Sərnişinlərə təhlükəsiz xidmət göstərməyə tam hazıram”.

Azərbaycan Yerüstü Nəqliyyat Agentliyinin mətbuat katibi Tural Orucov bildirib ki, təlim müddətində Agentliyin tədris-təlim mərkəzinin mütəxəssisləri tərəfindən xanım sürücülərə nəinki sürücülük vərdişləri, eləcə də davranış qaydaları, ünsiyyət bacarığı və təhlükəsizlik mövzuları aşılanıb.

“Sürücülər həmçinin dayanıb-durma qaydaları, manevretmə, müxtəlif qəza riskinin minimuma endirilməsi barədə xüsusi tapşırıqları yerinə yetiriblər. İki xanım artıq bu gündən fəaliyyətə başlayıb. Yaxın zamanda isə daha bir qadın sürücü “BakuBus”da işə başlayacaq”, – deyə T.Orucov bildirib.