"Bir sətiraltı sözləri var ki..." | İşi ilə yaşayan ustad jurnalist Aydın Əliyev

Baku TV Azərbaycanın idman jurnalistikasının inkişafında əvəzsiz rolu olan, peşəkarlığı, nitq mədəniyyəti və gənc jurnalistlərin yetişdirilməsindəki xidmətləri ilə tanınan ustad jurnalist Aydın Əliyev haqqında sənədli film hazırlayıb.

“Teledinozavr Aydın Əliyev” adlı ekran işində görkəmli jurnalistin zəngin yaradıcılıq yolu, televiziyadakı çoxillik fəaliyyəti və Azərbaycan jurnalistikasına verdiyi dəyərli töhfələrdən bəhs olunub.

Sənədli filmdə 65 ildir televiziyada çalışan Aydın Əliyev bu gün də fəaliyyətini sevə-sevə davam etdirdiyini bildirib:

“Yoldaşlarımın əksəriyyəti artıq təqaüddədir, dincəlirlər. Mənə isə tez-tez “sən hələ də yorulmursan, dinozavrsan, nəsən sən?” deyirlər. Yaxın dostlarım zarafatla “Teledinozavrın kefi necədir?” deyə soruşurlar”.

Filmdə Aydın Əliyevin yaxın dostları və tanınmış jurnalistlər onunla bağlı fikirlərini bölüşüblər.

Əməkdar artist Fikrət Adıgözəlli Aydın Əliyevin Azərbaycan dilinə olan böyük həssaslığını belə xatırlayır:

“Azərbaycan dilinin saflığını bu qədər qoruyan, onun təəssübünü çəkən ikinci bir insan tanımıram. Verilişi və ssenarini Aydın müəllimə təqdim edirdik. O, mətn üzərində qeydlərini aparır və biz montaja başlayırdıq. Elə dəyişikliklər, elə redaktələr edirdi ki, heyran qalırdıq. Deyirdik ki, Aydın müəllim, bu artıq bizim deyil, sizin yazınızdır. O isə belə cavab verirdi: “Yox, ideya sizindir, mən, sadəcə, cüzi düzəlişlər etmişəm”.