"Bir" və "İçərişəhər" Dövlət Tarix-Memarlıq Qoruğu İdarəsi memorandum imzalayıb - Baku TV

Qafqazın ilk tam inteqrasiya olunmuş bankçılıq, ödəniş və elektron ticarət ekosistemi olan “Bir” ilə “İçərişəhər” Dövlət Tarix-Memarlıq Qoruğu İdarəsi arasında Anlaşma Memorandumu imzalanıb.

Tərəfdaşlığın əsas məqsədi Azərbaycanın ən mühüm mədəniyyət ocaqlarından olan İçərişəhərdə sakinlər, sahibkarlar və turistlər üçün təqdim edilən təcrübəni rəqəmsal innovasiyalarla zənginləşdirməkdir.

Həyata keçirilməsi planlaşdırılan təşəbbüslərə ağıllı naviqasiya alətləri, çoxdilli rəqəmsal bələdçilər, QR koda əsaslanan məlumat sistemləri, süni intellekt dəstəkli çatbot və istifadəçi təcrübəsini asanlaşdıracaq vahid mobil veb-sayt daxildir.

İmzalanma mərasiminin ardından tərəflərin İçərişəhərdə gəzintisi təşkil edilib. Qoruq rəhbərliyi tərəfindən qonaqlara məkanın tarixi əhəmiyyətli abidələri haqqında ətraflı məlumat verilib.

Layihə çərçivəsində İçərişəhərin rəqəmsal bankçılıq və ödəniş infrastrukturunun gücləndirilməsi, muzey və tədbir biletlərinin satışının rəqəmsallaşdırılması, həmçinin vahid ziyarətçi mərkəzinin və loyallıq proqramının istifadəyə verilməsi nəzərdə tutulur.