"Burada birini vurdu, insan olsa..." | Zülmətə qərq olan küçələrdə nələr baş verir? - Baku TV

Artıq bir aya yaxındır ki, Naxçıvan şəhərinin bəzi küçə və prospektlərində işıqlandırma sistemi işləmir.

Sakinlər gecə saatlarında yolları əl fənərləri ilə işıqlandırmağa məcbur qalırlar.

Şəhərin Babək məhəlləsində yeni quraşdırılan işıq dirəklərinin də yanmadığı bildirilir.

Sakinlər mövcud vəziyyətin həm piyadalar, həm də sürücülər üçün təhlükə yaratdığını deyirlər.

“Ətraf qaranlıqdır, göz gözü görmür. Maşınlar keçir, işıq olmadığı üçün qəza təhlükəsi yaranır. Nə uşaqlar, nə də böyüklər yolu rahat keçə bilirlər. Burada dəfələrlə qəza baş verib. Marketə getmək belə çətindir. Sahibsiz itlər hər yanı bürüyüb, binaların girişlərinə doluşur, uşaqların üstünə cumur. Qaranlıqda isə onları görmək mümkün deyil”, – sakinlərdən biri bildirib.

Digər sakin isə problemin təxminən bir aydır davam etdiyini qeyd edib:

“Bu gün elə burada bir iti maşın vurdu. Onun yerində insan da ola bilərdi. Yaşlı adamlarıq, axşam gəzintiyə çıxmaq istəyirik, amma gözümüz yaxşı görmür. Bu qaranlıqda necə gedək?!”.

Məsələ ilə bağlı Naxçıvan Şəhər İcra Hakimiyyətindən bildirilib ki, şəhərin bəzi küçələrində işıqlandırma sisteminin müvəqqəti işləməməsi texniki nasazlıqlarla əlaqədardır.

Qeyd olunub ki, nasazlıqların aradan qaldırılması məqsədilə təchizatçı qurum tərəfindən təmir-bərpa işləri aparılır. Problemin qısa müddətdə həlli üçün zəruri tədbirlərin görüldüyü bildirilib.