"Dedilər ki, vura bilmərik, çıxmalıdır" | Bu uşaqlar niyə bağçaya qəbul olunmur? - Baku TV

Valideynlərin ən çox narahat olduğu məsələlərdən biri də xüsusi qayğıya ehtiyacı olan uşaqların bağçalara qəbulu prosesidir. Xüsusilə şəkərli diabet, autizm və digər bu kimi xəstəliklərdən əziyyət çəkən uşaqların bəzi məktəbəqədər təhsil müəssisələrində müxtəlif çətinliklərlə üzləşdiyi bildirilir.

Valideyn Hədiyyə Qurbanbəyli övladının üzləşdiyi problem haqda Baku TV-yə danışıb.

“Uşağımızı sentyabrın birindən bağçaya qoymuşduq. Bu ay öyrəndik ki, o, şəkərli diabet xəstəsidir. Bundan sonra bağça rəhbərliyi uşağı qəbul etməkdən imtina edir. İnsulin iynəsini vura bilməyəcəklərini və uşağın mütləq bağçadan çıxmalı olduğunu bildirirlər”, – o söyləyib.

Bəs xüsusi qayğıya ehtiyacı olan uşaqlar üçün bağçalarda şərait necə təşkil olunmalıdır?

Tibb üzrə fəlsəfə doktoru Abbas Bağırov qeyd edir ki, bu qrupdan olan uşaqlar üçün xüsusi nəzarət mexanizmləri müəyyən edilməlidir:

“Çünki onların lazımi tibbi preparatlarla vaxtında təmin olunması və fizioloji durumlarının nəzarətdə saxlanılması vacibdir. Belə uşaqlar üçün bağçalarda ayrıca şkaflar ayrılmalı, qanda şəkərin səviyyəsini ölçən xüsusi cihazlar və digər zəruri tibbi ləvazimatlar saxlanılmalıdır. Eyni zamanda uşaqların vaxtlı-vaxtında qidalanmasına ciddi nəzarət edilməli, onların rasionuna uyğun qida məhsulları mütləq ayrıca seçilməli və rejimə uyğun təqdim olunmalıdır. Lazımi şərait yaradıldıqdan sonra belə uşaqların bağçaya getməsində heç bir risk yoxdur”.

Xüsusi qayğıya ehtiyacı olan uşaqların bağçalarda təhlükəsiz və rahat şəkildə təhsil alması üçün tətbiq olunmalı mexanizmlərə toxunan təhsil üzrə ekspert Ramin Nurəliyev isə bildirir ki, xroniki xəstəliyi olan uşaqların bağçalarda təhsil alması üçün həmin müəssisələrdə tərbiyəçilərlə yanaşı, loqopedlərin, fizioterapevtlərin və psixoloqların da fəaliyyət göstərməsi mütləqdir:

“İnklüziv təhsillə bağlı BMT-nin xüsusi qətnaməsi mövcuddur və xroniki xəstəliyi olan uşaqların təhsildən kənarda saxlanılması qətiyyən qəbuledilməzdir. Əgər hər hansı bir məktəbəqədər təhsil müəssisəsi bu qrupdan olan uşaqların qəbulunu həyata keçirirsə, valideyn də tam qanuni şəkildə həmin müəssisədə xüsusi dayələrin fəaliyyət göstərməsini tələb edə bilər”.