"Hamısı qaçdı üstümə, ayağımdan dişlədilər" | Şamaxıda sahibsiz it problemi

Şamaxıda sahibsiz itlərin sayı günü-gündən artır. Küçələrdə sürü şəklində gəzən itlər sakinlərə təhlükə yaradır.

Sakinlər iddia edirlər ki, problemlə bağlı aidiyyəti qurumlara dəfələrlə müraciət etsələr də, məsələ həllini tapmayıb.

“Millət bu itlərin əlindən boğaza yığılıb. O gün uşaqları itin əlindən güclə aldım. Mən nə qədər onları qovacağam?! Aidiyyəti qurumlar buna bir çarə tapsınlar”, – narazı sakinlərdən biri söyləyib.

Heyvanın hücumuna məruz qalan uşaq isə belə deyib: “İt üstümə qaçaraq ayağımdan dişlədi. Məni xəstəxanaya güclə çatdırdılar. İtlərin əlindən çölə çıxmağa qorxuram”.

Məsələ ilə bağlı Şamaxı Rayon İcra Hakimiyyətindən bildirilib ki, 2024-cü ildə rayon ərazisində mövcud olan sahibsiz itlər üçün Rayon İcra Hakimiyyətinin və şəhər bələdiyyəsinin təşəbbüsü ilə müvəqqəti sığınacaq yeri yaradılıb və 250-dən artıq sahibsiz itin qeyd olunan sığınacaqda yerləşdirilməsi təmin olunub:

“Sahibsiz itlər müvəqqəti sığınacaqda saxlanılarkən özlərini “heyvanların müdafiəçisi” və “ictimai fəal” kimi təqdim edən, əslində isə sahibsiz itlərin saxlanılmasına heç bir dəstək göstərməyən bəzi şəxslər müxtəlif vaxtlarda sığınacağın işinə yersiz müdaxilələr edərək fəaliyyətinə mane olublar. Sığınacaq bir ildən artıq müddətdə fəaliyyət göstərib, hazırda işləmir”.

Şamaxı Rayon İcra Hakimiyyətindən həmçinin qeyd olunub ki, rayon ərazisindəki sahibsiz itlər üçün mövcud norma və qaydalara uyğun müvafiq sığınacağın yaradılması məsələsinə baxılacaq.