"JF-17 Thunder"in inanılmaz özəllikləri bu raketləri geridə qoyur | Xüsusiyyətlər nələrdir?

Baku TV-nin “Hərbi xronika” rubrikasının yeni buraxılışında Azərbaycanın Pakistandan aldığı “JF-17 Thunder Block 3” qırıcı təyyarələrinin sayını artırmaq niyyəti və bunun regional hərbi-strateji balansda yaratdığı əhəmiyyətli dəyişikliklərdən bəhs olunub.

Bildirilib ki, Azərbaycan, Pakistan və Çin istehsalı olan “JF-17 Thunder Block 3” qırıcı təyyarələrinin sayını iki dəfədən çox artırmağa hazırlaşır. Bu alış Cənubi Qafqazda güc balansına təsir göstərə biləcək strateji addım kimi qiymətləndirilir.

ABŞ-nin CLRCUT portalı və Malayziya mənşəli “Defence Security Asia” bu məsələ ilə bağlı xüsusi materiallar yayıb. Rəsmi şəkildə təsdiqlənməsə də, dəyəri 4,2 milyard dollar olduğu iddia edilən müqavilə müxtəlif mənbələrdə ciddi müzakirə olunur.

“JF-17 Block 3” təyyarələri qabaqcıl avionika, radar və silah sistemləri ilə Azərbaycanın müharibədən sonrakı müdafiə doktrinasına tam cavab verir.

Azərbaycan bu təyyarələrə Türkiyənin “Gökdoğan” və “Bozdoğan” raketlərini inteqrasiya etməklə çoxvektorlu müdafiə xəttini daha da gücləndirir. Bu proses ölkənin hərbi modernləşməsi və geosiyasi nüfuzunun artması baxımından mühüm mərhələ kimi təqdim olunur.