"Keşlə bazarı"nın satıcılarına 1 ay vaxt verildi | Bu qədər malı hara aparacağam?

“Keşlə bazarı”nın söküntü işləri təxirə salınıb.

Azərbaycan Avtomobil Yolları Dövlət Agentliyindən verilən məlumata görə, Həsən Əliyev küçəsindən Ziya Bünyadov prospektinə paralel olaraq “Koroğlu” stansiyasına qədər yeni avtomobil yolunun tikinti işləri icra olunur.

Yeni yolun tikintisi ilə əlaqədar olaraq tikinti altına düşən yaşayış və qeyri-yaşayış obyektlərinin, həmçinin torpaq sahələrinin ölçüləri hazırlanıb və tikinti altına düşən maneələrin qiymətləndirilməsi işləri yerinə yetirilib. Bu çərçivədə tikinti altına düşən yaşayış və qeyri-yaşayış obyektlərinin, o cümlədən “Keşlə bazarı” kimi tanınan ticarət mərkəzinin də sökülməsi nəzərdə tutulur.

Sözügedən bazarda sahibkarlıq fəaliyyəti ilə məşğul olan vətəndaşların çoxsaylı müraciətləri nəzərə alınaraq söküntü işlərinin başlanılması 2025-ci ilin fevral ayının 1-nə qədər təxirə salınır.

Baku TV məsələ ilə bağlı satıcıların rəyini öyrənmək üçün “Keşlə bazarı”nda olub. “Müddət uzun olsaydı, daha yaxşı olardı. Fevralın 1-nə kimi uzadılması bizə sərf etmir. Bu camaat da yazıqdır, heç olmasa, aprelə kimi vaxt verərdilər”, – deyə narazı satıcılardan biri bildirib.