"Lotu Quli"ni öldürənlərə hökm oxundu

2020-ci ildə Türkiyənin Antalya şəhərində qətlə yetirilən və kriminal aləmdə “Lotu Quli” ləqəbi ilə tanınan Nadir Səlifovun qətlində şübhəli bilinən şəxslərə hökm oxunub.

Təqsirləndirilənlərdən 29 yaşlı Xaqan Zeynalov və yaşıdı Əmir Həmidli ömürlük, Əli Mövlamlı və Rəsul Həsənov isə hər biri 12 il 6 ay müddətinə azadlıqdan məhrum ediliblər. Həbs olunmayan dörd təqsirləndirilən şəxsə isə bəraət verilib.

Hadisə ilə bağlı axtarışda olan və hələ də tutulmayan Cəfər Əlizadə, Namiq Canıyev və Xanımnisə Məmmədovanın cinayət işinin icraatı ayrılıb. Camal Həsənov isə bir müddət əvvəl Bakı Ağır Cinayətlər Məhkəməsinin hökmü ilə 19 il müddətinə azadlıqdan məhrum edilib.

Xatırladaq ki, 2020-ci il avqustun 20-də gecə saatlarında Boğazkent rayonunda yerləşən hotelin restoranında Nazir Əzizoğlunun adına olan şəxsiyyət vəsiqəsindən istifadə edən “Lotu Quli”yə yaxın adamlardan Xaqan Zeynalov baş nahiyəsindən iki güllə vurub.

N.Səlifovun adamlarının cavab atəşi açması nəticəsində yaralanan Xaqan Zeynalov hoteldən çıxaraq onu gözləyən Əmir Həmidlinin idarə etdiyi kirayə avtomobillə qaçıb. Hadisə yerinə gələn həkim briqadasının ilkin müdaxiləsindən sonra xəstəxanaya aparılan N.Səlifov dünyasını dəyişib.

Bakırköy Prokurorluğunun göstərişi ilə İstanbul Polis İdarəsi Mütəşəkkil Cinayətkarlıqla Mübarizə Şöbəsi qrupları tərəfindən aparılan araşdırmada hadisənin kriminal aləmdə “Lənkəranski” ləqəbi ilə tanınan və 18 avqust 2016-cı ildə Beşiktaşda qətlə yetirilən Rövşən Canıyevin qətlinin qisasını almaq məqsədilə törədildiyi müəyyən edilib.