"Məğlub olurduq, amma Günay elə bir şey etdi ki..." - Qadın şahmatçımızın başına nələr gəldi?

Baku TV Azərbaycan şahmatçısı Günay Məmmədzadə haqqında reportaj hazırlayıb.

Günay Məmmədzadə 2014-cü ildə, 14 yaşında olarkən qadınlar arasında beynəlxalq qrosmeyster adına yiyələnib və bununla da Azərbaycan qadın şahmatı tarixində belə gənc yaşda bu ada layiq görülmüş ilk şahmatçı olub. 2018-ci ildə isə o, kişilər arasında beynəlxalq usta adına layiq görülüb.

Şahmatçı FİDE-nin 2023-cü ilin iyun ayı üçün olan reytinq siyahısında 2456 xalla Azərbaycan qadın şahmatçıları arasında birinci, “Ən yaxşı 100 qadın şahmatçı” siyahısında isə 25-ci yerdə qərarlaşıb. O, FİDE-nin reytinq siyahısında əmsalına (2483, oktyabr 2022) görə ən yüksək nəticə göstərmiş azərbaycanlı qadın şahmatçıdır.

Günay şahmata necə gəlməyindən bəhs edərkən qeyd edib ki, bu idman növünə marağı nənə və babasının sayəsində yaranıb: “Nənəmlə babam böyük şahmatsevərlər idilər. Həmişə şahmat oynayırdılar. Onlardan biri uduzanda aralarında mübahisə baş verirdi və bu, mənə maraqlı gəlirdi. Daha sonra valideynlərim bunu görüb məni şahmat məktəbinə yazdırdılar”.

Şahmatçının atası Vüqar Məmmədov isə deyib ki, Günayın uğur qazanması üçün çətinliklərlə qarşılaşsalar da, bunun öhdəsindən gələ biliblər: “Uşağın inkişaf etməsi üçün valideynlər çox diqqətli olmalıdırlar. Xaricə gedəndə özəl diqqət və maliyyə lazım olur. Bəzən nəticə olmadan belə yarışda iştirak etməlisən. Çox çətin məqamlar yaşasaq da, onları aşmışıq”.

Arzularının böyük bir hissəsini gerçəkləşdirdiyini söyləyən G.Məmmədzadə istəyinə tam çatmadığını vurğulayıb: “Pəncərədən bayıra baxanda görürdüm ki, uşaqlar həyətdə oynayırlar, mən isə şahmatla məşğul olurdum. Həmin dövrü xatırlayanda düşünürəm ki, uşaqlığım olmayıb. Amma bilirəm ki, bu mənim arzularım üçün idi”.