"Zəfərimiz xarici ölkələrdə dərsliyə salınıb" | Qələbəyə gedən yolda nələr yaşandı? - Baku TV

Azərbaycan Ordusunun ehtiyatda olan polkovniki Şaiq Məmmədov Baku TV-yə keçdiyi döyüş yolundan danışıb.

O bildirib ki, ordu sıralarına 1991-ci ildə qoşulub. 1992-ci ilin aprel ayında 239 saylı xüsusi təyinatlı batalyon formalaşdırılıb və ilk döyüş tapşırığı ilə Ağdərə rayonuna ezam olunublar.

Ş.Məmmədov qeyd edib ki, döyüşlərin birində düşmənin atdığı minaatan mərmisi onun olduğu səngərə düşüb: “Həmin vaxt yanımda olan bir neçə əsgər şəhid oldu, mən isə ağır yaralandım”.

O vurğulayıb ki, 2020-ci ildə başlayan Vətən müharibəsi zamanı da səfərbərlik çağırışına qoşularaq döyüşlərdə iştirak edib və Azərbaycanın tarixi Zəfərinə şahidlik edib.

Ş.Məmmədovun sözlərinə görə, bu gün Azərbaycan Ordusunun Vətən müharibəsində qazandığı uğurlar dünyanın bir çox ölkələrinin diqqət mərkəzindədir:

“Bir çox ölkələr Azərbaycan Ordusunun döyüş təcrübəsinə böyük maraq göstərir. Ordumuzun qazandığı təcrübə artıq xarici ölkələrin hərbi dərsliklərində də istifadə olunur”.