Rafael İsgəndərov şəhid olan dostu Müşfiq Abbasov haqqında danışdı

Baku TV iki oğlu ilə könüllü olaraq döyüşlərə qatılan və şəhidlik zirvəsinə ucalan, Birinci Qarabağ savaşında da iştirak etmiş Müşfiq Abbasov haqqında reportaj hazırlayıb.

M.Abbasov Ağdam istiqamətində bir çox hərbi əməliyyatlarda müvəffəqiyyətlər qazanıb və 6 oktyabr 2020-ci ildə rayonun Qərvənd kəndi istiqamətində gedən döyüşlərdə şəhid olub.

Prezident İlham Əliyevin sərəncamları ilə M. Abbasov ölümündən sonra “Vətən uğrunda”, “Ağdamın azad olunmasına görə” medalları ilə təltif edilib.

Atası ilə xatirələrindən danışan Şamil Abbasov M.Abbasovun övladlarını kiçik yaşlarından vətənpərvər ruhda böyütdüyünü deyib:

“Atam qardaşları ilə birlikdə Birinci Qarabağ müharibəsində iştirak edib. O, həmişə göstərdiyi döyüş şücaətlərindən bəhs edərdi. Bizi də vətənə, müharibəyə yararlı bir döyüşçü, əsgər olmağa hazırlayırdı. Biz əsgərlikdə öz yoldaşlarımızdan fiziki gücümüz, güllə atmaq qabiliyyətimizə görə həmişə fərqlənmişik. Bunun səbəbkarı elə atam olub”.

Şəhidin dostu aktyor Rafael İsgəndərov Müşfiq Abbasovla son görüşündən bəhs edib.

“Müharibəyə getməmişdən bir həftə əvvəl bizə gəldi. Oturduq, söhbət etdik. Döyüşlərə qatılacağını söylədi. Dedim ki, Müşfiq, sənin 50 yaşın var, vicdanın, Vətən qarşısında təmizsən, bəlkə getməyəsən. O da “Mənim 50 yaşım var, onun 18 ilini Ağdamda yaşamışam, 2 ilini Rusiyada keçirmişəm. Qalan 30 ilini isə mən yaşamamışam” dedi”, – deyə aktyor bildirib.

Şəhidin oğlu İntiqam Abbasov atasının şəhidlik zirvəsinə yüksəldiyi gün haqqında danışıb:

“Həmin gecə Goranboy çox qaranlıq idi, ayın işığı belə görünmürdü. Axşam da atamla danışmışdım. Bir az keçəndən sonra hamı yatmağa getdi, mən yatmadım. Çox narahat idim. Hər gün səhər 5-6 radələrində atam zəng edirdi. Saat 8-ə işləmişdi, hələ də zəng etməmişdi. Hiss edirdim ki, bütün hərbi hissə atamın şəhid olduğunu bilir, amma mənə demirlər. Atama zəng etdim. Döyüş yoldaşı cavab verdi, əmim də yanında idi. Mənə dedi ki, əmin yaralanıb, təcili gəl. Dedim ki, mən gəlsəm, nə olacaq ki? Döyüşə gəlmişik, yaralana da, şəhid də ola bilərik. Belə deyəndə əmim ağladı. Telefonu yerə qoyub balaca qardaşıma zəng etdim, onda bildim ki, atam şəhid olub”.