Səhiyyə işçilərinin əməkhaqqı və bonusları ilə bağlı açıqlama

“Səhiyyə işçilərinin əməkhaqları aylıq vəzifə (tarif) maaşı, sabit həvəsləndirici əlavə 800 manat və işin nəticələrinə görə bonuslardan ibarətdir”.

Bu barədə İcbari Tibbi Sığorta üzrə Dövlət Agentliyinin nümayəndəsi Leyla Lətifova məlumat verib. O bildirib ki, səhiyyə işçilərinə əməkhaqları əməyin dərəcəsinə görə verilir:

“Həkimlərin aylıq vəzifə (tarif) maaşı 9-15 dərəcə arasında dəyişərək 478-607 manat, aylıq sabit həvəsləndirici əlavəsi isə 800 manat təşkil edir”.

Agentlik nümayəndəsi həmçinin qeyd edib ki, həkimlərə işin nəticələrinə görə bonuslar 15 -35 pasiyentə görə verilir: “Yəni həkim ay ərzində (22 iş günü) gündə 35 pasiyent qəbul edərsə, bu, o deməkdir ki, ümumilikdə 770 xəstəyə baxır. Bu isə 1047 manat edir”.

Leyla Lətifova onu da əlavə edib ki, bonuslar tibbi xidmətin tarifinə görə dəyişir: “Tariflər ambulator xidməti üzrə 3-295, cərrahi xidmətlər üzrə isə 10-24 min manat arasında dəyişir. Hazırda dövlət xəstəxanalarında maksimum 28 min manat bonus alan ürək-damar cərrahı, 12 min manat alan mama-ginekoloq və 8 min manat alan travmatoloq var”.