Sənət adamlarına qarşı laqeydlik

"Ramiz Novruzun vəfatı teatr üçün faciədir. O, Akademik Milli Dram Teatrını çiynində aparıb, "Həzi Aslanov" obrazı yaradan insandır. Onu belə dəfn etməyi qəbul etmirəm. Vaxt var idi, Akademik Milli Dram Teatrında Əməkdar artistləri çiynimizdə aparıb dəfn edirdik”.

Mərhum aktyor Ramiz Novruzla vida mərasimində Xalq artisti Əli Nurun bu nitqi sosial medianın gündəminə çevrildi. Səslənən fikirlər geniş müzakirələrə səbəb oldu. Vəfat edən sənət adamları ilə vida mərasimlərinin çalışdıqları teatrlarda yox, onların evlərində keçirilməsini qınayanların sayı az deyildi. Əli Nurun həmkarları da onunla eyni fikirdədir.

“Hər bir aktyorun arzusudur ki, son mənzilə teatrdan aparılsın. Mən də istəyərdim ki, doğma teatrımdan yola salınım”, - deyə Xalq artisti Naibə Allahverdiyeva qeyd edib.

Azərbaycan Dövlət Dram Teatrının sözçüsü Cavid Zeynallı şifahi olaraq bildirib ki, teatr tabeli qurum olduğundan qərarları Mədəniyyət Nazirliyi qəbul edir.

Baku TV Mədəniyyət Nazirliyinə müraciət etsə də, nazirlikdən məsələ ilə bağlı hər hansı mövqe açıqlayan olmayıb.