Şüvəlanda dərdi də, təmiri də bitməyən park | Uşaqların həyatı təhlükədə qalıb

Şüvəlan qəsəbəsinin Şimal DRES massivində salınan park hazırda baxımsız və təhlükəli vəziyyətdədir.

Parkda işıqlandırma sistemi yoxdur, yollar palçıqlıdır, yaşıllıqlar isə quruyub.

Sakinlər dəfələrlə şikayət etsələr də, hələlik heç bir tədbir görülməyib.

Baku TV-nin qaynar xəttinə müraciət edən sakinlər bildiriblər ki, park artıq bir ilə yaxındır acınacaqlı vəziyyətdədir.

“Bir il əvvəl gəlib burada lazım olan işləri yarımçıq gördülər. 6-7 aydır 20 minə yaxın ağac əkilib, ancaq su olmadığından hamısı quruyub. Asfalt isə pis vəziyyətdədir, toz-torpaq evimizin içərisinə dolur. Kimə müraciət ediriksə, xeyri yoxdur”, – deyə sakinlərdən biri narazılığını dilə gətirib.

Məsələ ilə bağlı Xəzər rayonu 130 saylı Mənzil-Kommunal İstismar Sahəsindən bildirilib ki, Şüvəlan qəsəbəsi, Şimal DRES massivində 14, 16, 18, 20 və 2, 4, 6, 8 saylı ərazilərdə park salınıb, lakin asfalt örtüyü hələ döşənməyib:

“Bəzi kiçik çatışmazlıqlar mövcuddur. Onlar yaxın vaxtlarda aradan qaldırılacaq və məsələ tezliklə həll olunacaq”.

Parkın tikinti işlərini həyata keçirən “Bakı Şəhər Əsaslı Tikinti və Təmir” MMC-dən isə qeyd edilib ki, problemdən xəbərdardırlar və məsələ bu ilin sonuna qədər həll olunacaq.