Tanınmış tiktoker "Arzum"la bağlı məhkəmə qərarının detalları açıqlandı - Baku TV

Yol qəzasında bir nəfərin ölümü və digərinin xəsarət almasında təqsirləndirilən "Arzum 999" ləqəbli tiktoker İlduzə Hacıyevanın cinayət işi üzrə məhkəməsi keçirilib.

Prosesin ilkin mərhələsində İlduzə Hacıyevanın vəkili Hikmət Əliyev müdafiə çıxışı zamanı vəsatətlə çıxış edərək, mövcud cinayət işinin yenidən ibtidai istintaqa qaytarılmasını və yenidən hadisə yerinə baxış keçirilməsini istəyib. Prokuror isə öz növbəsində bu vəsatətə etirazını bildirərək, təmin olunmamasını təklif edib.

Məhkəmə yerində müşavirə keçirərək vəsatəti təmin etməyib. Vəkillərin müdafiə çıxışlarından sonra İlduzə Hacıyevaya son söz üçün söz verilib. İlduzə Hacıyeva çıxışı zamanı özünü təsirli bilmədiyini deyərək, səbəbsiz yerə 6 ay azyaşlı övladından ayrı qaldığını bildirib.

Müşavirədən sonra hökm elan edilərək, İlduzə Hacıyeva 2 il 6 ay sürücülük hüququndan məhrum edilməklə 5 il 2 ay azadlıqdan məhrum olunub. O, məhkəmə zalında həbs edilib.