Uzunömürlülüyün sirri açıqlandı | Yaşlılar üçün faydalı olan qidalar

Yumurtanın müəyyən miqdarda istehlakı yaşlı insanlarda ürək-damar xəstəliklərindən ölüm riskini azalda bilər.

Avstraliyalı alimlər apardıqları araşdırmadan sonra bu qənaətə gəliblər.

Mütəxəssislərin nəticələri elmi layihədə iştirak edən 70 və daha yuxarı yaşda olan 8756 yetkin şəxsin məlumatlarına əsaslanır.

Tədqiqat iştirakçıları yumurta istehlakının tezliyi barədə məlumat veriblər: heç vaxt/nadir hallarda, həftəlik və ya gündəlik istifadə edənlər olub.

Alimlər aşkar ediblər ki, yumurtanı nadir hallarda və ya heç vaxt istehlak etməyənlərlə müqayisədə həftədə 1-6 dəfə yumurta yeyənlərdə bütün səbəblərdən ölüm riski 15%, ürək-damar xəstəliklərindən ölüm riski isə 29% daha aşağı olub.

“Yumurta yüksəkkeyfiyyətli zülal, “B” qrupu vitaminlər, doymamış yağ turşuları, xolin və digər vacib mikroelementlərlə zəngin olan qidalı məhsuldur. Onlar xüsusilə yaşlı insanlar üçün faydalıdır, çünki fiziki funksiyaların yaşla əlaqəli azalması ilə üzləşə bilərlər” – deyə alimlər bildiriblər.

Tədqiqat həmçinin göstərib ki, qidalanma keyfiyyəti orta və ya yüksək olan yaşlı insanlarda rasiona yumurta əlavə etmək ürək-damar xəstəliklərindən ölüm riskini müvafiq olaraq 33% və 44% azaldır.