Xaricdə təhsil vəd edən şirkətlər vətəndaşları aldadır?

Xaricdə təhsil almaq istəyənlərin çoxu bu sahədə xidmətlər təklif edən özəl təhsil şirkətlərinə müraciət etsə də, bəzən necə deyərlər, arzuları ürəklərində qalır. Vətəndaşlar xaricdə təhsil vəd edən bəzi şirkətlərin qurbanına çevrilirlər.

Mütəxəssislərin fikrincə, yalnız attestatla xaricdə daha prestijli təhsil imkanı yaradan bu şirkətlərlə əməkdaşlıq etmədən öncə proseslərin hüquqi formada aparıldığından əmin olmaq lazımdır.

Xaricdə təhsil alanların canına xof salan məsələlərdən biri də diplomun tanınıb-tanınmamasıdır. Məsələ ilə bağlı Elm və Təhsil Nazirliyi yanında Təhsildə Keyfiyyət Təminatı Agentliyinin şöbə müdiri Aytən Quliyeva bildirib ki, xarici diplomların tanınması üçün vətəndaşlar agentliyin elektron ünvanına müraciət etməlidirlər:

“Xarici universitetə üz tutan vətəndaş mütləq həmin ali təhsil müəssisəsinin statusu barədə məlumata sahib olmalıdır. Xarici universitetin tanınma prosesində vacib məqamlardan biri onun akkreditasiyasının olub-olmamasıdır. Bu amilə vətəndaşlar xüsusi diqqət yetirməlidirlər”.

Aytən Quliyeva onu da qeyd edib ki, agentlik xaricdə təhsil və diplomların tanınması ilə bağlı heç bir şirkət və ya fiziki şəxslə əməkdaşlıq etmir. Eyni zamanda həmin şəxslərin fəaliyyətinə görə də məsuliyyət daşımır.