Yarımçıq piyada yolu, həyati risk | Sürücülər bu dairədə nə edəcəyini bilmir - NECƏ OLMALIDIR?

“Necə olmalıdır?” rubrikasının budəfəki buraxılışında paytaxtın “Binəqədi dörd yol” kimi tanınan ərazisində yol hərəkətinin təşkili ilə bağlı mövcud problemlərdən bəhs olunub.

Bildirilib ki, Binəqədi şosesi, Azadlıq prospekti və “Baksol yolu”nun kəsişməsində hərəkətin səmərəli təşkil edilməməsi, üfüqi nişanlanma xətlərinin silinməsi və xaotik nəqliyyat axını səbəbindən ərazidə çoxsaylı konflikt nöqtələri yaranır.

Vurğulanıb ki, bir istiqamətdə yaşıl işıq yandığı zaman digər istiqamətə dönmək istəyən nəqliyyat vasitələri kəsişmənin ortasında qalır və bəzən növbəti yaşıl işığadək ərazini tərk edə bilmir. Nəticədə, kəsişən istiqamətlərdə nəqliyyat sıxlığı yaranır.

Qeyd olunub ki, yol nişanlanması da sürücülər və piyadalar üçün əlavə çətinlik yaradır. Belə ki, zolağın bir hissəsi geri dönmə sahəsinə düşür, piyadaların təhlükəsizliyini təmin edən üfüqi nişanlanma isə demək olar ki, görünmür. Bu səbəbdən də sözügedən kəsişmədə hərəkətin təşkilinə yenidən baxılmasının zəruri olduğu bildirilib.