2024-cü ildə 3 alim kimya üzrə mükafata layiq görüldü

2024-cü ilin Kimya üzrə “Nobel” mükafatı laureatları məlum olub.

Mükafat ABŞ vətəndaşı olan Devid Beyker, britaniyalı Demis Hassabis və Con Camperə verilib.

Nobel Komitəsinin yaydığı məlumatda bildirilib ki, Devid Beyker hesablana bilən zülal dizaynına görə, D.Hassabis və C.Camper isə zülal strukturunun proqnozlaşdırılmasına görə mükafata layiq görülüblər.

Qeyd edək ki, D.Beyker 1962-ci ildə ABŞ-nin Vaşinqton ştatında anadan olub. O, biokimya, genom elmləri, biomühəndislik, kimya mühəndisliyi, kompüter elmləri və fizika üzrə bir sıra yeniliklərə imza atıb. D.Hassabis isə 1976-cı ildə İngiltərənin paytaxtı Londonda doğulub. O, süni intellekt tədqiqatçısı, nevroloq və kompüter oyunları tərtibatçısıdır. Digər nobel mükafatçısı C.Camper isə ABŞ-nin Arkanzas ştatında anadan olub. O, ölkənin “DeepMind Technologies” şirkətinin baş elmi işçisi vəzifəsində çalışır.