8 Avropa ölkəsinin müdafiə maliyyələşdirilməsi təsdiqləndi

Avropa Komissiyası SAFE militarizasiya proqramı çərçivəsində Avropa İttifaqının 8 üzv dövləti üçün müdafiə sahəsində maliyyələşdirilmənin birinci mərhələsini təsdiqləyib.

Bu barədə Avropa Komissiyasının saytında dərc olunmuş press-relizdə bildirilib.

"Avropa Komissiyası 8 üzv dövlətin milli müdafiə planlarını təsdiqləyib ki, bu da Avropanın təhlükəsizliyini gücləndirmək səylərində mühüm addımdır. Komissiya Şuraya Belçika, Bolqarıstan, Danimarka, İspaniya, Xorvatiya, Kipr, Portuqaliya və Rumıniya üçün maliyyə yardımını təsdiqləmək üçün təklif təqdim edib", – deyə məlumatda bildirilir.

Sənədə əsasən, maliyyələşdirmə sazişlərinin imzalanması nəticəsində təxminən 38 milyard avro məbləğində uzunmüddətli kreditlərin ayrılması nəzərdə tutulur.

Məlumata görə, tədbirlər bu ölkələrə təcili olaraq hərbi hazırlıqlarını artırmağa və lazımi müasir hərbi texnika əldə etməyə imkan verəcək, həmçinin Ukraynanın Avropa İttifaqının təhlükəsizlik ekosisteminə inteqrasiyasını asanlaşdıracaq.