ABŞ, Çin, Rusiya, Almaniya və Hindistan bu siyahıda liderdir

2025-ci ildə dünya dövlətlərinin məcmu hərbi xərcləri 2024-cü ilin göstəricisi ilə müqayisədə 2,9% artaraq 2 trilyon 887 milyard dollar təşkil edib.

Bu barədə Stokholm Beynəlxalq Sülh Araşdırmaları İnstitutunun yeni hesabatında yazılıb.

İnstitutun analitiklərinin qiymətləndirmələrinə görə, ABŞ-də hərbi ehtiyaclara çəkilən xərclər azaldığı halda, Avropada bu xərclər 14%, Asiya-Sakit okean regionunda isə 8,1% artıb.

Bununla yanaşı, ən böyük müdafiə büdcəsinə malik üç dövlət – ABŞ, Çin və Rusiya birlikdə 1 trilyon 480 milyard dollar xərcləyib ki, bu da dünya həcminin 51%-nə bərabərdir.

Rusiyanın hərbi xərcləri 2025-ci ildə 5,9% artaraq 190 milyard dollara çatıb ki, bu da onun ÜDM-nin 7,5%-ni təşkil edir.

2025-ci ildə hərbi məqsədlər üçün ən çox vəsait xərcləyən yeddinci ölkə Ukrayna xərclərini 20% artıraraq 84,1 milyard dollara və ya ÜDM-in 40%-nə çatdırıb.

Hərbi xərclərdəki artım artıq ardıcıl on birinci ildir ki, qeydə alınır. Onların dünya ümumi daxili məhsuluna nisbəti 2,5%-ə çatıb ki, bu da 2009-cu ildən bəri ən yüksək göstəricidir.

Amerikanın xərcləri nəzərə alınmadan 2025-ci ildə silahlanmaya çəkilən ümumdünya xərcləri 9,2% artıb. Müdafiə xərclərinin həcminə görə ilk beşliyi ABŞ, Çin, Rusiya, Almaniya və Hindistan təşkil edib ki, bütün dünya hərbi xərclərinin 58%-i ümumilikdə onların payına düşüb.