ABŞ üçün qaranlıq məqam | Trampı özündən çıxaran nə oldu?

ABŞ Prezidenti Donald Tramp mühafizəkar fəal Çarli Kirkin öldürülməsində əli olan hər kəsi tapıb cəzalandıracağını vəd edib.

Oval Ofisdən 4 dəqiqəlik videomüraciətində Prezident Yuta ştatındakı kollec şəhərciyində Çarli Kirkin dəhşətli qətli ilə bağlı kədər və qəzəblə dolu olduğunu söyləyib: “Çarli milyonları ruhlandırdı və bu gecə onu tanıyan və sevən hər kəs şok və dəhşət içində birləşdi”.

Tramp ailəsinin siyasi müttəfiqi və şəxsi dostuna çevrilən Kirklə yaxın əlaqələrini qeyd edib, onun ölkəni gəzmək və “xoşniyyətli debatlar” aparmaq səylərini təsvir edərək əlavə edib: “Bu, Amerika üçün qaranlıq məqamdır”.

Tramp həmçinin Kirkin “həqiqət və azadlıq uğrunda şəhid” olduğunu qeyd edib və mərhumun ailəsi üçün dualar oxumağa çağırıb.

Prezident fəalın ölümünü 2024-cü ilin iyulunda Batlerdə özünün güllələnməsi, eləcə də digər səs-küylü zorakılıq hadisələri ilə əlaqələndirib. Xüsusilə lider dekabr ayında Nyu-Yorkda Birləşmiş Səhiyyə İdarəsi rəhbərinin güllələnməsini və 2017-ci ildə Nümayəndələr Palatasının çoxluğunun lideri Stiv Skalizəyə qarşı sui-qəsd cəhdini xatırladıb, “radikal solun siyasi zorakılığını” vurğulayıb.

Prezident deyib ki, amerikalılar və media zorakılıq və qətlin fikir ayrılığına düşdüyünüz şəxsləri şeytanlaşdırmağın faciəvi nəticələri olduğunu qəbul etməlidir.

Tramp siyasi zorakılıqla mübarizə üçün daha geniş planı açıqlayaraq əlavə tədbirlər görəcəyini vəd edib:

“Mənim administrasiyam bu cinayətdə və digər siyasi zorakılıq hallarında iştirak edən hər kəsi, o cümlədən onu maliyyələşdirən və dəstəkləyən təşkilatları, həmçinin hakimlərimizi, hüquq-mühafizə orqanlarını və ölkəmizin təhlükəsizliyini qoruyan hər kəsi hədəf alanları tapacaq”.