Almaniya işçilər üçün qanunları asanlaşdırır

Almaniyada şirkətlərin 90 faizi ixtisaslı işçi tapmaqda çətinlik çəkir.

10 min nəfərin iştirak etdiyi sorğuda respondentlərin 76 faizi vakant vəzifələr səbəbindən iş yerlərində məhsuldarlığın aşağı düşdüyünü bildiriblər. Dövlət sektorunda çalışanların 88 faizi işçi çatışmazlığı səbəbindən məhsul və xidmətlərin təqdim edilməsində problemlərin olduğunu qeyd ediblər.

Hazırda Almaniyada təxminən 50 min müəllim və 14 min tibb bacısı üçün boş iş yeri var. Ölkədəki bütün işəgötürənlərin üçdəbiri işə yeni kadrlar götürməyi düşünür.

Almaniyaya ixtisaslı işçilərin gəlməsini asanlaşdıracaq yeni qanunun 2024-cü ilin martında qüvvəyə minməsi nəzərdə tutulub. Qanun ölkəyə ixtisaslı işçi vizası ilə gələn şəxslərə şamil ediləcək.

Yeni qanuna görə, Avropa İttifaqı hüdudlarından kənarda olan ixtisaslı işçilərin ölkəyə gələrək yaşayış icazəsi və vətəndaşlıq alması asanlaşacaq. Həmçinin alman dili bilikləri üçün minimum tələb səviyyəsi A2-dən A1-ə endiriləcək.