Ankara Avropa Parlamentinin sanksiya təşəbbüsünə etiraz edib

Türkiyənin Avropa Parlamenti ilə münasibətləri növbəti böhran yaşayır.

Ankara Avropa Parlamentinin üzvlərindən birinin – Türkiyənin ədliyyə naziri Akın Gürlekin Avropa İttifaqının sanksiya siyahılarına daxil edilməsi təklifinə kəskin reaksiya verib.

Bu təşəbbüs iyunun 17-də Avropa Parlamenti səsverməsinə çıxarılacaq “Türkiyə üzrə hesabat” layihəsində yer alır. Buna cavab olaraq, Türkiyənin ədliyyə naziri Avropa Parlamentinin üzvlərinin Türkiyə məhkəmə sisteminə və şəxsən öz ünvanına tənqidləri “ideoloji qərəzlik”lə əlaqələndirib.

Gürlek Avropa Parlamentinin Türkiyə məhkəmə sisteminə hücumlarının uğursuzluğa məhkum olduğuna əmin edib.

Ədliyyə naziri vurğulayıb ki, Türkiyə Cümhuriyyəti demokratiya prinsiplərinə sadiq olan müstəqil, suveren dövlətdir, burada qanunun aliliyinə hörmət edilir və əsrlər boyu mövcud olan dövlətçilik ənənələrinə əsaslanırlar:

“Türkiyə məhkəmə sistemi Konstitusiya və qanunlara uyğun olaraq qərarlar qəbul edir, hökmlər isə xalqın adından çıxarılır. Avropa Parlamentindəki müəyyən dairələr tərəfindən dəstəklənən siyasi motivli yanaşmalar Avropa İttifaqı qurumlarına olan etimadı sarsıdır. Müstəqil məhkəmələrin qərarları bizim üçün prioritet olaraq qalır. Türkiyə məhkəmə sistemi üzərində təzyiq və ya nəzarət etmək ehtimalı ilə bağlı heç kimin heç bir illüziyası olmamalıdır. Biz qanunun aliliyinə əsaslanaraq bundan sonra da borcumuzu yerinə yetirməyə davam edəcəyik”, – deyə o əlavə edib.