Antonio Tayaninin son bəyanatlarından sonra gərginlik artıb

Nikaraqua hakimiyyəti İtaliya ilə diplomatik əlaqələrin kəsildiyini elan edib.

Buna səbəb kimi İtaliyanın xarici işlər naziri Antonio Tayaninin bu ölkəyə qarşı səsləndirdiyi bəyanatlar göstərilib.

"Əlaqələrin kəsilməsi İtaliyanın xarici işlər naziri Antonio Tayaninin xalqlar və hökumətlər arasındakı münasibət prinsiplərinə məhəl qoymayaraq, Nikaraqua xalqını və hakimiyyətini təhqir edən əsassız, aqressiv və məsuliyyətsiz bəyanatlarına cavabdır", – deyə Nikaraqua hökumətinin məlumatında bildirilir.

Gərginlik İtaliyanın keçmiş baş naziri Aldo Moronun qatillərindən biri olan terrorçu Alessio Kazimirrinin ekstradisiya edilməsi ilə bağlı İtaliya tərəfinin növbəti dəfə sorğu göndərməsindən sonra yaranıb. Alessio Kazimirri uzun illərdir ki, Nikaraquada gizlənir.

İyulun 16-da Madriddə çıxış edən Aantonio Tayani 1978-ci ildə "Qırmızı briqadalar" qruplaşmasının üzvləri tərəfindən qətlə yetirilən Aldo Moronun xatirəsini yad edib və Nikaraqua hakimiyyətini terrorçuya sığınacaq verməkdə, eləcə də ekstradisiya sorğularını icra etməkdən imtina etməkdə günahlandırıb.

İtaliya ədliyyəsinin məlumatına görə, Alessio Kazimirri Aldo Moronun qətli ilə birbaşa əlaqəli olub və 1980-ci illərin əvvəllərində Nikaraquaya qaçıb.