Avropa İttifaqında yaşayan əcnəbilərin sayı 64 milyonu ötüb

2025-ci ildə Avropa İttifaqında yaşayan miqrantların sayı rekord həddə – 64,2 milyon nəfərə çatıb ki, bu da bir il əvvəlki göstəricidən 2,1 milyon nəfər çoxdur.

Bu barədə Miqrasiya Analizi Tədqiqat Mərkəzinin hesabatında deyilir.

Hesabata görə, Almaniya əcnəbi vətəndaşların sayına görə Aİ-nin ən böyük ölkəsi olaraq qalır – təxminən 18 milyon nəfər, onların təqribən 72%-i əmək qabiliyyətli yaşdadır.

Eyni zamanda son dövrlərdə ən sürətli artım İspaniyada qeydə alınıb: ölkədəki miqrantların sayı təxminən 700 min nəfər artaraq, 9,5 milyon nəfərə çatıb.

Tədqiqatda qeyd olunur ki, Almaniya həm mütləq göstəricilər, həm də əhali sayı nəzərə alınmaqla Avropada miqrantlar üçün əsas istiqamət olaraq qalmaqda davam edir.

Məruzədə həmçinin vurğulanır ki, Aİ daxilində miqrasiya son dərəcə qeyri-bərabər paylanıb: əhaliyə nisbətən immiqrantların ən yüksək payı Lüksemburqda, Maltada və Kiprdə müşahidə olunur.

Sığınacaq müraciətləri ilə bağlı da oxşar mənzərə var – onlar məhdud sayda ölkələrdə cəmlənib. Bütün müraciətlərin demək olar ki, 75%-i İspaniya, İtaliya, Fransa və Almaniyanın payına düşür ki, bu zaman yenə Almaniya ən çox qaçqını qəbul edən ölkə statusunu qoruyub saxlayır – təxminən 2,7 milyon nəfər.