Avropanın altında gizlənən sirr açıldı | Qitə ilə toqquşma yaşanıb, sonra isə...

Utrext Universitetinin alimləri Aralıq dənizi regionunun mürəkkəb geoloji quruluşunu araşdırarkən, 140 milyon il əvvəl Yerin altına batmağa başlayan “Böyük Adria” adlı qədim qitənin qalıqlarını aşkarlayıblar.

Bu diqqətçəkici kəşf Avropanın geoloji inkişafı ilə bağlı biliklərimizə mühüm töhfə verir. O həmçinin bu qitədəki nəhəng dağ silsilələrinin necə formalaşdığına dair yeni ipucları təqdim edir.

Həmçinin Aralıq dənizi regionunda tez-tez baş verən zəlzələ və vulkanik aktivliklərin daha dəqiq proqnozlaşdırılmasına kömək edə bilər.

“Böyük Adria” adlı bu itmiş qitənin tarixi təxminən 240 milyon il əvvələ, Yer kürəsinin tamamilə fərqli göründüyü dövrə gedib çıxır. Həmin vaxt bu quru sahəsi “Gondvana” adlı nəhəng superqitənin şimal kənarında yerləşirdi. Superqitə parçalandıqca, “Böyük Adria” da bugünkü Şimali Afrika ilə əlaqəsini itirib və təkbaşına hərəkət etməyə başlayıb. O, şimala irəlilədikcə, daha dayanıqlı Avropa qitəsi ilə toqquşub. Bu prosedur milyonlarla il çəkib və nəticədə “Böyük Adria”nın böyük hissəsi Avropanın altına doğru batmağa başlayıb.

Aralıq dənizi regionu geoloqlar üçün həmişə mürəkkəb bir tapmaca olub. Tektonik plitələrin bir-birinə sürtünməsi, bükülməsi və parçalanması bu bölgəni çoxlaylı bir geoloji struktura çevirib. Bütün bu çətinliklərə baxmayaraq, Utrext Universitetinin alimləri “Böyük Adria”nın yeraltı xəritəsini tərtib etməyə nail olublar.