Azərbaycanlı namizəd İran prezidenti ola bilər? - İlkin rəylər bilindi

İranda növbədənkənar prezident seçkisi üçün səsvermə başlayıb.

Seçki məntəqələri yerli vaxtla saat 08:00-da açılıb. Dövlət başçısı postu uğrunda 4 namizəd mübarizə aparır.

İran Konstitusiyasının Keşikçilər Şurası əvvəlcə 6 siyasətçinin ərizəsini təsdiq etsə də, iyunun 26-da mühafizəkarların xeyrinə namizədliyini geri götürdüyünü elan edən vitse-prezident Əmir Hüseyn Qazizadə Haşimidən sonra Tehran meri Əlirza Zəkani də iyunun 27-də analoji qərar verib. O, mühafizəkarlar qanadından iki əsas namizədi – parlamentin spikeri Məhəmməd Bağır Qalibafı və respublikanın Təhlükəsizlik Şurasındakı ruhani liderin nümayəndəsi Səid Cəlilini dəstəkləyib.

Onlardan başqa yarışda mühafizəkar keçmiş Daxili İşlər və Ədliyyə Nazirliklərinin rəhbəri Mostafa Purməhəmmadi və islahatçı düşərgədən yeganə namizəd – keçmiş səhiyyə naziri Məsud Pezeşkian da var.

Beyin mərkəzlərinin bütün seçki kampaniyası boyu keçirdiyi rəy sorğularının son nəticələrinə görə, hazırda M.Pezeşkian liderdir. Cüzi fərqlə Cəlili və Qalibaf müvafiq olaraq ikinci və üçüncü yerləri tuturlar.