Baykar şirkətinin yeni qanadlı raketi sınaqdan keçirildi

Türkiyənin “Baykar” şirkəti tərəfindən hazırlanmış yüksək texnologiyalı pilotsuz sistemlərin sınaqları uğurla davam edir.

Baykar Uçuş Tədris və Sınaq Mərkəzində “Kemankeş 2” mini ağıllı qanadlı raketinin sınaq prosesinə start verilib.

Təxminən 1 saat havada qala bilən mini smart qanadlı raket reaktiv mühərriki sayəsində sürətlə hərərkət edir və düşmən xəttinin arxasındakı ən riskli hədəflərə qarşı təsir etmək imkanına malikdir. 200 kilometr uçuş məsafəsi olan “Kemankeş 2” süni intellektlə dəstəklənən optik bələdçilik sistemi sayəsində hədəfini tanıyır və çətin hava şəraitində belə onu tam dəqiqliklə məhv edə bilir.

O, süni intellektlə dəstəklənən avtopilot sistemi ilə avtonom uçuş həyata keçirərək və strateji hədəfləri yüksək dəqiqliklə zərərsizləşdirməklə döyüş meydanında tarazlığı dəyişməyə qadirdir. Əldə etdiyi bütün məlumat və şəkilləri yer idarəetmə stansiyasına ötürərək istifadəçiyə məlumatların izlənməsində də dəstək verir.

“Baykar” tərəfindən strateji hədəflərə qarşı istifadə üçün hazırlanmış mini smart qanadlı raketin ilk versiyası olan “Kemankeş 1” ilk dəfə 27 aprel - 1 may tarixləri arasında Atatürk Hava Limanında keçirilən “TEKNOFEST - 2023” sərgisində nümayiş etdirilib.