Beynəlxalq təşkilatlar həyəcan təbili çalır

16 iyul 2023 298 baxış

İranda azyaşlıların məcburi əməyə cəlb edilməsi halları artıb.

Ölkədəki İnsan Haqları Təşkilatının məlumatına görə, Şimali Xorasan əyalətinin Sosial Yardım Təşkilatında uşaqların məcburi işlədilməsi ilə bağlı 158 fakt qeydə alınıb.

Təşkilatın sədr müavini Hüseyn Xəlilzadə həmin uşaqların kimliyini müəyyən etməklə yanaşı, onların əməyinin müxtəlif sahələrdə qanunsuz istismar olunduğunu da etiraf edib.

“Bu uşaqlar küçələrdə və ictimai yollarda küçə ticarəti ilə məşğul olurlar. Təşkilatımız isə ilkin olaraq həmin uşaqların qəyyumlarını müəyyənləşdirib və onları bu əməllərindən çəkinməli olduğu barədə məlumatlandırıb”, – deyə qurum rəsmisi bildirib.

Əlavə edib ki, bu əməllər təkrarlanarsa, işləyən uşaqların ailələri cinayət məsuliyyətinə cəlb ediləcək və məhkəmə qarşısına çıxarılacaqlar.

Xatırladaq ki, Beynəlxalq Əmək Təşkilatının dərc etdiyi statistikaya əsasən, İranda 10 milyona yaxın uşaq məcburi əməyə cəlb olunub.

#İran