Dəhşətə gətirən görüntü | Avtobus çaya aşdı, xeyli insan öldü

Banqladeşdə sərnişin avtobusu Padma çayına düşüb. Hadisə nəticəsində azı 25 nəfər ölüb.

Yanğından mühafizə və mülki müdafiə xidmətinin nümayəndəsi bildirib ki, sərnişin avtobusu Banqladeşin mərkəzi hissəsində pontonda bərəyə minməyi gözləyərkən çaya düşüb. Nəqliyyat vasitəsində 40-a yaxın insan olub.

Xilasedicilər hadisədən bir neçə saat sonra avtobusu çayın dibindən çıxarıblar.

"Axtarış-xilasetmə işləri ordu, polis, sahil mühafizəsi və yerli administrasiyanın dəstəyi ilə 10 dalğıc da daxil olmaqla dörd bölmə tərəfindən həyata keçirilib", – deyə yanğından mühafizə xidmətindən bildirilib.

Hazırda ölən 25 nəfərdən 23-nün şəxsiyyəti müəyyənləşdirilib. Ölənlər arasında qadınlar və uşaqlar var. Rəsmilər daha çox sərnişinin itkin düşə biləcəyindən narahatdırlar.

Qeyd edək ki, Banqladeşdə hər il yüzlərlə insan yol və bərə qəzalarında ölür.