Ermənistan səfirinə şiddətli töhmət veriləcək | İsrail hərəkətə keçdi

Ermənistanın İsraildəki səfiri yəhudi dövlətinin Xarici İşlər Nazirliyinə çağırılıb.

Bu barədə nazirliyin mətbuat xidməti məlumat yayıb.

Bildirilib ki, buna səbəb rəsmi İrəvanın Fələstinin müstəqilliyini tanıması olub. Xəbərə görə, Ermənistanın İsraildəki səfirinə şiddətli töhmət veriləcək.

Məlumat üçün bildirək ki, iyunun 21-də Ermənistan Xarici İşlər Nazirliyi Fələstin Dövlətinin tanınması ilə bağlı bəyanat yayıb.

Sənəddə qeyd olunub ki, müxtəlif beynəlxalq platformalarda Ermənistan həmişə Fələstin probleminin sülh yolu ilə və hərtərəfli həllini müdafiə edib və İsrail-Fələstin münaqişəsinin həllinin “iki dövlət” prinsipini dəstəkləyib.