Filippində 7.8 bal gücündə zəlzələ | Ölənlərin sayı artır

Filippin sahillərində 7.8 bal gücündə zəlzələ qeydə alınıb.

Avropa-Aralıq dənizi Seysmoloji Mərkəzinin məlumatına görə, zəlzələnin episentri təxminən 697 min əhalisi olan General-Santos şəhərindən 51 km şimalda, ocağı 10 km dərinlikdə yerləşib.

Filippin Mülki Müdafiə İdarəsinin məlumatına görə, hadisə nəticəsində ən azı 19 nəfər həlak olub. Dağıntılar altında qalan şəxslərin xilasetmə işləri davam edir və ölü sayının artacağı istisna olunmur.

Filippin Mülki Aviasiya İdarəsi zəlzələ və sunami xəbərdarlığı səbəbindən General Santos hava limanının fəaliyyətinin müvəqqəti olaraq dayandırıldığını açıqlayıb.

Yerli medianın məlumatına görə, Mindanaoda bir neçə məktəb binasının uçması nəticəsində dərslər dayandırılıb.

Ölkə Prezidenti Ferdinand Markos da yeraltı təkanlardan sonra Mindanaonun bəzi ərazilərində dərslərin dayandırılması ilə bağlı əmr verib. Dövlət başçısı dövlət qurumlarına fəlakətlərin nəticələrinin aradan qaldırılması çalışmalarını koordinasiya etməyi, humanitar yardımın göstərilməsini tapşırıb.

Zəlzələdən sonra Yaponiyanın bir neçə bölgəsindəki sahil ərazilərində sunami xəbərdarlığı verilib. 10 minlərlə sakinin təxliyə edilməsi tövsiyə edilib.