Fransa Polineziyaya qarşı demokratik və siyasi inkar siyasəti aparır | Antoni Geros

Fransız Polineziyası Parlamentinin sədri Entoni Geros BMT-nin Dekolonizasiya üzrə Xüsusi Komitəsinin regional konfransında çıxış edib.

O, çıxışında Fransız Polineziyasının 1946-cı ildə BMT-nin dekolonizasiya edilməli ərazilər siyahısından Fransa Dövlətinin məqsədyönlü siyasəti nəticəsində çıxarıldığını vurğulayaraq, ölkəsinin yenidən həmin siyahıya yalnız 2013-cü ildə daxil edildiyini vurğulayıb.

E.Geros sədr müavini olduğu Tavini Partiyasının 1977-ci ildə təsis edildiyi gündən ölkənin azadlığı naminə mübarizə apardığını diqqətə çatdıraraq Fransanın dekolonizasiya istiqamətində dialoqdan qaçdığını bildirib.

Fransanı “idarəedici qüvvə” adlandıran Entoni Geros rəsmi Parisin Polineziyaya qarşı demokratik və siyasi inkar siyasətini davam etdirməsindən təəssüfləndiklərini vurğulayıb. O, Fransanın konfransdakı təmsilçisindən bu məsələlərə aydınlıq gətirməsini tələb edib.

Fransa tərəfinin susması isə heç kəsi təəccübləndirməyib, çünki cavab uzun illər olduğu kimi yenə gəlməyib.

Çıxışının sonunda Entoni Geros hərəkətə keçməyin vaxtının çatdığını qeyd edərək Dekolonizasiya üzrə Xüsusi Komitənin missiyasının Polineziyaya göndərilməsinin və müvafiq yol xəritəsinin Polineziya ilə bağlı qəbul edilən qətnaməyə salınmasının vacibliyini vurğulayıb.