İranda hərbi əməliyyatlar nə vaxtadək davam edəcək?

İranın vurulan raketinin qalıqları ABŞ-nin İsraildəki konsulunun iqamətgahına düşüb.

Nəticədə bina zədələnib. Ölən və ya yaralananlar barədə məlumat verilmir.

"İsrail və ABŞ məqsədlərinə çatanadək İrana qarşı müharibəni davam etdirmək niyyətindədirlər". Bu barədə İsrailin xarici işlər naziri Gideon Saar deyib.

İsrail Ordusunun sözçüsü, briqada generalı Effi Defrinin sözlərinə görə, İranda əməliyyatların ən azı daha üç həftə davam etdirilməsi planlaşdırırlır. Qeyd edilib ki, həmin əməliyyatlar çərçivəsində minlərlə hədəfə zərbələr endiriləcək.

"ABŞ Prezidenti Donald Trampın bəyanatları gülməlidir". Bu fikri isə İran parlamentinin sədri Məhəmməd Bağer Qalibaf səsləndirib.

"Son iki həftə ərzində Donald Tramp doqquz dəfə bizi məğlub etdiyini bildirib. Bu, həqiqətən gülməlidir", – deyə Məhəmməd Bağer Qalibaf əlavə edib.

Rəsmi Tehran qarşı tərəfi təslim olmağa məcbur etmək üçün Hörmüz boğazında gəmiçilik hərəkətinə nəzarət də daxil olmaqla, istənilən vasitəyə əl atacağını vurğulayıb.

Bu arada, XIV Leo Yaxın Şərq xalqlarının iki həftədir müharibənin dəhşətli zorakılığından əziyyət çəkdiyini, minlərlə günahsız insanın həlak olduğunu, çoxlu sayda insanın evlərini tərk etməyə məcbur qaldığını bildirib. Roma Papası Yaxın Şərqdə atəşi dayandırmağa, dialoqu bərpa etməyə çağırıb.