İsrail xarici işlər naziri həmkarlarına səsləndi

İsraildə fövqəladə vəziyyət elan olunacağı xəbərindən sonra universitetlər və çimərliklər bağlanıb.

"Hizbullah"ın hücumları ilə əlaqədar ölkə ərazisində fəaliyyət göstərən bəzi universitetlərdə dərslər ləğv edilib, təhsilin distant şəkildə davam etdirilməsi nəzərdə tutulub.

Bununla yanaşı, İsrail Hərbi Hava Qüvvələrinin onlarla qırıcısı "Hizbullah"ın Livanın cənubunda yerləşən obyektlərinə zərbələr endirməyə davam edir.

Bu barədə İsrail Müdafiə Ordusunun rəsmi nümayəndəsi Daniel Haqari açıqlama verib.

"Hazırda Hərbi Hava Qüvvələrinin onlarla qırıcısı Livanın cənubundakı bir neçə yerə zərbələr endirir. Biz təhdidləri məhv etməyə və "Hizbullah" terror qruplaşmasına intensiv zərbələr endirməyə davam edirik", – deyə məlumatda qeyd olunur.

Bundan əlavə, İsrail dünyanın onlarla ölkəsinin hökumətindən "Hizbullah" radikal hərəkatına qarşı mübarizədə onu dəstəkləmələrini istəyib.

Ölkənin xarici işlər naziri vurğulayıb ki, İsrail vətəndaşlarını və ərazilərini yəhudi dövlətini məhv etmək məqsədi daşıyan İranın rəhbərlik etdiyi "şər oxu”ndan qorumaq üçün fəaliyyət göstərir.

Qeyd edək ki, "Hizbullah" hərəkatı Beyrutda hərbi qanad komandiri Fuad Şükrün öldürülməsinə cavab olaraq İsrailə zərbələr endirib. Livandan İsrailə doğru 320-dən çox raket atılıb və ölkədəki 11 hərbi baza atəşə tutulub.