Jitomirdə sənədlərin yoxlanılması 4 nəfərin ölümü ilə nəticələndi

Ukraynanın Jitomir vilayətinin Ovruç dəmir yolu stansiyasında sənədlərin yoxlanılması zamanı bir kişi partlayıcını işə salıb, nəticədə, 4 nəfər həlak olub.

Vilayətin polisi oktyabrın 24-də dəmir yolu stansiyasında ölümcül hadisənin baş verdiyini təsdiqləyib. İnsident baş verən ərazidə istintaq-operativ qruplar işləyir və partlayışın başvermə səbəbləri araşdırılır.

Daxili İşlər Nazirliyinin sözçüsü Maryana Reva 4 nəfərin öldüyünü təsdiqləyib. Həlak olanlardan ikisi Sərhəd Xidmətinin əməkdaşı, ikisi isə mülki şəxsdir. Bundan başqa, partlayış nəticəsində iki hərbçi və 10 mülki şəxs xəsarət alıb.

Partlayışı 23 yaşlı Xarkov sakininin törətdiyi bildirilir. Hadisəni törədən şəxs isə ölümcül yaralar alıb və xəstəxanaya aparılarkən təcili tibbi yardım avtomobilində həlak olub. Buna görə də hadisənin başvermə səbəbləri hələ ki tam aydın deyil. Amma hüquq-mühafizə orqanları faktla bağlı araşdırma aparır.

Qeyd edək ki, daha əvvəl partlayış nəticəsində 5 nəfərin öldüyü bildirilsə də, Ukraynanın müvafiq orqanları bu məlumatı təkzib edib.