Jurnalistlər efirdə girov götürüldü | Ekvador Prezidenti çarəsiz halda

Ekvadorda baş verən iğtişaşlar fonunda mafiya liderlərindən birinin həbsxanadan yoxa çıxması ölkə vəziyyətini daha da gərginləşdirib.

Prezident Daniel Noboanın 22 mafiya qrupunu terror təşkilatı adlandırması isə vəziyyəti daha da çıxılmaz edib. Açıqlamadan hiddətlənən kriminal qruplaşmalar bütün ölkə ərazisində çaxnaşmalar yaradıblar.

Yerli medianın xəbərinə görə, özlərini narkotik kartelinin nəhəngləri adlandıranlarla polis arasında toqquşmalar yaşanıb. Nəticədə azı 10 nəfər ölüb, çox sayda yaralı var. Mafiya üzvləri hətta yerli televiziya kanallarından birinə daxil olaraq əməkdaşlarını girov götürüblər.

Ekvador polis rəisi verdiyi açıqlamada bildirib ki, aksiyalarla bağlı artıq 13 nəfər saxlanılıb və onların üzərindən bir neçə odlu silah, iki qumbara və partlayıcı maddə müsadirə edilib.

Etirazçıların bəziləri isə küçələrdəki avtomobilləri partlatmağa hazırlaşarkən zərərsizləşdirilib. Polis rəisi onu da əlavə edib ki, ölkənin 24 əyalətində gərginlik artır. Artıq 6 həbsxanada iğtişaşlar baş qaldırıb, bir neçə mühafizəçi girov götürülüb.

Ölkədə hökm sürən iğtişaşlar səbəbindən Prezident Daniel Noboa artıq fövqəladə vəziyyətin elan edilməsi ilə bağlı qərar qəbul edib, komendant saatı tətbiq edilib.

Xatırladaq ki, 2023-ü ilin oktyabrında prezident seçilən Daniel Noboa ölkəni bürüyən cinayət dalğasını cilovlamağa söz verərkən bildirmişdi ki, bu banditizm dalğasını yaradan hər kəs layiqli cəzasını alacaq.